دانش یونیورسٹی دی تعمیر دے منصوبے دی تفصیلاں ݙو ہفتیاں اچ ٻݨا تے پیش کیتی ونڄن، وزیر اعظم دی جائزہ اجلاس اچ ہدایت

اسلام آباد۔ 03 ستمبر (اے پی پی) وزیر اعظم محمد شہباز شریف آکھیا جو دانش یونیورسٹی اچ معاشی طور تے کمزور طبقے دے ذہین طلباء تے طالبات کوں بین الاقوامی معیار دی تعلیم یقینی بݨائی ویسی، دانش یونیورسٹی دے قیام اچ ایں ڳالھ دا خاص خیال رکھیا ونڄے جو ایں دا نظام روایتی یونیورسٹیاں توں ہٹ تے تے بہترین رکھیا ونڄے۔ خمیس کوں وزیر اعظم آفس دے میڈیا ونگ توں جاری بیان دے مطابق وزیراعظم محمد شہباز شریف دی صدارت دانش یونیورسٹی بارے جائزہ اجلاس تھیا۔ وزیر اعظم ہدایت کیتی جو یونیورسٹی دی تعمیر دی معینہ مدت نال منصوبے دی تفصیلاں آئندہ ݙو ہفتیاں اچ مرتب کر تے پیش کیتی ونڄن۔ انہاں آکھیا جو دانش یونیورسٹی دے قیام دے پچھوں مرکزی محرکات اچوں اولین، غریب تے متوسط طبقے دے طلبا تے طالبات کوں بین الاقوامی معیار دی تعلیم تے پیشہ ورانہ تربیت دی فراہمی اے، یونیورسٹی دے آؤٹ ریچ پروگرام اچ ایں عنصر کوں کلیدی اہمیت ݙتی ونڄے جو معاشی طور تے کمزور تے متوسط طبقے دے ٻالاں دی ایں کیتے آگہی تے رسائی یقینی بݨائی ونڄے۔ اجلاس کوں دانش یونیورسٹی دے بورڈ ولوں بین الاقوامی معیار دی فیکلٹی تے تعمیر دے پلان تے مرحلیاں تے بریفنگ ݙتی ڳئی۔ اجلاس کوں ݙسایا ڳیا جو دانش یونیورسٹی اچ بین الاقوامی یونیورسٹیاں توں ڈگری یافتہ عالمی شہرت دی حامل فیکلٹی دیاں تدریسی خدمات حاصل کیتیاں ویسن ڄیندے کیتے فیکلٹی دے نال نال امریکہ دے معروف کالج دیاں خدمات حاصل کرݨ کیتے اقدامات حتمی مرحلیاں اچ ہن۔ اجلاس کوں فیکلٹی دی تفصیلاں تے کالج دے نال تدریسی نظام دے حوالے نال اڄوکے مذاکرات تے بریفنگ ݙتی ڳئی۔ اجلاس کوں ٻیا ݙسایا ڳیا جو یونیورسٹی دی تعمیر بین الاقوامی سطح تے رائج سٹیٹ آف دی آرٹ کیمپس ڈیزائن دے مطابق کیتی ویسی ڄیندے کیتے بڈنگ جلد کیتی ویسی۔ اجلاس کوں یونیورسٹی دا مجوزہ ڈیزائن تے پلان وی ݙکھایا ڳیا۔ اجلاس اچ وفاقی وزراء ڈاکٹر مصدق مسعود ملک، عطاء اللہ تارڑ، چیئرمین وزیر اعظم یوتھ پروگرام رانا مشہود احمد خاں، دانش یونیورسٹی دے بورڈ دے ارکان تے متعلقہ اعلیٰ حکام شرکت کیتی۔