قائم مقام صدرسید یوسف رضا گیلانی دا پاکستان نیوی ڈے دے موقع تے پاک بحریہ دے افسراں تے اہلکاراں کوں خراجِ تحسین

اسلام آباد۔ 07 ستمبر(اے پی پی) قائم مقام صدر سید یوسف رضا گیلانی پاکستان نیوی ڈے دے موقع تے پاک بحریہ دے افسراں تے اہلکاراں کوں خراجِ تحسین پیش کریندے ملکی بحری سرحداں، ساحلی سلامتی تے قومی مفادات دے تحفظ اچ انہاں دے کردار دی تعریف کیتی۔ اپݨے پیغام اچ قائم مقام صدرآکھیا جو پاکستان نیوی ڈے پاک بحریہ دی جرأت، قربانیاں تے پیشہ ورانہ صلاحیتاں کوں یاد کرݨ دا ڈینھ اے۔ انہاں آکھیا جو 1965ء دی جنگ دے دوران پاک بحریہ غیر معمولی بہادری تے حکمتِ عملی دا مظاہرہ کریندے ملک دی بحری حدود دے دفاع دے عزم دا ثبوت ݙتا۔ ایوانِ صدر دے پریس ونگ توں جاری بیان موجب سید یوسف رضا گیلانی آپریشن سومناتھ کوں پاک بحریہ دی حکمتِ عملی، جرأت تے پیشہ ورانہ مہارت دی ہک نمایاں مثال قرار ݙیندے آکھیا جو ایں آپریشن دشمن دی دفاعی صلاحیتاں کوں نمایاں ضیان پڄایا تے اے ملکی دفاعی تاریخ دا ہک قابلِ فخر باب اے۔ انہاں آکھیا جو گزریل سالاں دے دوران پاک بحریہ ہک جدید تے ہمہ جہت بحری قوت دے طور تے ترقی کرچکی اے ڄہڑی دفاعی تے علاقائی سطح تے ابھردے نویں چیلنجز نال نبڑݨ دی صلاحیت رکھیندی اے۔ قائم مقام صدر موجب پاک بحریہ صرف ملکی بحری سرحداں دے دفاع تئیں محدود نی بلکہ بحری سلامتی، سمندری تجارتی رستیں دے تحفظ، عالمی امن مشناں تے قدرتی آفتاں دے دوران انسانی امداد اچ وی اہم کردار ادا کریندی پئی اے۔ انہاں آکھیا جو معرکہ حق تے آپریشن بنیان مرصوص دے دوران وی پاک بحریہ ملک دی ساحلی تے بحری سرحداں دے تحفظ کیتے بھرپور چوکسی تے تیاری برقرار رکھی۔ سید یوسف رضا گیلانی وطن دے دفاع اچ جاناں دا نذرانہ پیش کرݨ آلے پاک بحریہ دے شہداء کوں خراجِ عقیدت پیش کریندے آکھیا جو قوم انہاں دیاں قربانیاں کوں ہمیشہ یاد رکھیسی۔ انہاں غازیاں دیاں خذمتاں دی وی تعریف کریندے آکھیے جو انہاں دیاں پیشہ ورانہ خذمتاں پوری قوم کیتے ماݨ دی ڳالھ ہن۔ قائم مقام صدر ایں عزم دا اعادہ کیتا جو پاکستان ہک امن پسند ملک اے تے علاقائی امن، استحکام تے تعاون کیتے پرعزم اے تاں جو ملکی خودمختاری تے علاقائی سالمیت تے کوئی سمجھوتہ نی کیتا ونڄ سڳدا۔ انہاں اعتماد دا اظہار کیتا جو پاک بحریہ اپݨی پیشہ ورانہ روایتاں تے اعلیٰ معیار کوں برقرار رکھیندے پاکستان دی بحری سرحداں دے دفاع دے عزم کوں جاری رکھیسی۔ سید یوسف رضا گیلانی پاک بحریہ دے سارے افسراں تے اہلکاراں کیتے نیک خواہشات دا اظہار کریندے آکھیا جو پوری قوم اپݨے بحری محافظاں دے نال کھڑی اے تے انہاں دیاں خذمتاں کوں قدر دی نگاہ نال ݙیکھدی اے۔