اوکھے حالات دے باوجود مشاورت نال بنیادی اصلاحات کیتیاں ڳئن، انفورسمنٹ دے ذریعے ہک سال اچ 800 ارب روپے ریکور کیتے ڳئن، برآمدات تے مبنی معاشی ترقی اولین ترجیح اے، وزیرِاعظم شہباز شریف

اسلام آباد۔ 08 ستمبر (اے پی پی) وزیرِاعظم محمد شہباز شریف آکھیے جو اوکھے حالات دے باوجود مشاورت نال بنیادی اصلاحات کیتیاں ڳئن، انفورسمنٹ دے ذریعے ہک سال اچ 800 ارب روپے ریکور کیتے ڳئن، برآمدات تے مبنی معاشی ترقی اولین ترجیح اے۔ اے ڳالھ انہاں ممتاز صنعتکاراں تے کاروباری شخصیات دے وفد نال ملاقات اچ آکھی ۔انہاں آکھیا جو تاجر برادری تے صنعتکاراں کوں خوش آمدید اکھینداں۔ انہاں آکھیا جو اڄوکے بجٹ توں پہلے صنعتکاراں تے تاجر برادری نال ٻہوں ملاقاتاں کیتیاں تے انہاں نال گھاٹی مشاورت تھئی۔ وزیرِخزانہ، وزیرِ تجارت تے ٻئے اعلیٰ افسراں وی ملاقاتاں کیتیاں۔ وزیرِاعظم آکھیا جو اوکھے حالات اچ تاجر برادری دی معاونت نال نمایاں اقدامات کیتے ڳئن تے ٻہوں اصلاحات متعارف کروائیاں ڳئیاں۔ انہاں آکھیا جو انفورسمنٹ دے ذریعے ہک سال اچ 800 ارب روپے ریکور کیتے ڳئے، کوئی نواں ٹیکس نی لاتا ڳیا، براہِ راست ٹیکس تے سیلز ٹیکس صارفین ادا کریندن، اے حقیقت اے جو پاکستان دی تاریخ اچ ماضی اچ ایویں نی تھیا جیویں بہتری آندی ڳئی اے۔ انہاں آکھیا جو لمبے سفر اچ صنعتکاراں تے تاجر برادری دی مشاورت شامل رہی، ٹیم ورک دے ذریعے درست راہ تے گامزن ہیسے۔ انہاں آکھیا جو تاجر برادری دی مشاورت نال اڳوں ودھسوں۔ وزیرِاعظم آکھیا جو اساکوں برآمدات تے مبنی ترقی کوں ودھارا ݙیوݨا اے، حکومت برآمد کنندگان کوں خاص طور تے ٹیکس اچ ریلیف ݙتے، تاجر برادری کوں برآمدات اچ ودھارے کیتے اپݨی صلاح دا ݙساوݨا چاہیدے۔ ایں موقع تے ڳالھ کریندے معروف صنعتکار عارف حبیب آکھیا جو حکومت دے بجٹ تے برآمدات دے ودھارے سانڳے کیتے ڳئے اقدامات کوں چنڳاں آکھدوں ، امید اے جو ملک اچ ٻئی سرمایہ کاری آسی تے برآمدات اچ ودھارا تھیسی۔ معروف صنعتکار عمر سعید آکھیا جو حکومتی اقدامات نال سرمایہ کاری کیتے تاجر برادری دے اعتماد اچ ودھارا تھئے۔ جاز دے چیف ایگزیکٹو افسر عامر ابراہیم آکھیا جو ٹیلی کمیونیکیشن سودھے مختلف شعبیں اچ برآمدات اچ ودھارے تے توجہ مرکوز کیتی ڳئی اے، انفراسٹرکچر تے اے آئی تے وی ڳالھ کیتی ڳئی، پاکستان اچ اے آئی فیکٹریاں بالخصوص ڈیٹا سنٹر تے توجہ مرکوز کیتی ڳئی۔ معروف صنعتکار شہزاد سلیم آکھیا جو وزیرِاعظم محمد شہباز شریف تاجر برادری دیاں تجویزاں تے سفارشات غور نال سݨیاں ہن تے تاجر برادری دے مسئلے حل کرݨ دیاں ہدایات کیتن ڄہڑا جو ٻہوں چنڳاں قدم اے۔ معروف صنعتکار جاوید بھلوانی آکھیا جو کراچی سودھے مختلف شہراں اچ ایف بی آر دے دفتر کھولݨ وزیرِاعظم دا احسن اقدام اے، ایویں دیاں ملاقاتاں تسلسل نال تھیوݨیاں چاہیدن، ایں نال ملکی برآمدات تے معیشت اچ بہتری آسی۔