ملک اچ برداشت، احترامِ انسانیت، امن تے بین المذاہب ہم آہنگی کوں ٻیا مستحکم کرݨ دی لوڑھ اے، قائم مقام صدر سید یوسف رضا گیلانی دا بین المذاہب ہم آہنگی کانفرنس نال خطاب

اسلام آباد۔8ستمبر(اے پی پی) قائم مقام صدر سید یوسف رضا گیلانی ملک اچ برداشت، احترامِ انسانیت، امن تے بین المذاہب ہم آہنگی دے ودھارے تے زور ݙیندے آکھیے جو ہک پُرامن، متحد تے مضبوط پاکستان کیتے معاشرے دے سارے طبقیں کوں رل تے اپݨا کردار ادا کرݨا ہوسی۔ اے ڳالھ انہاں “احترامِ انسانیت، دفاعِ پاکستان تے پیغامِ پاکستان دا ودھارا” دے عنوان نال منعقدہ بین الاقوامی امن و بین المذاہب ہم آہنگی کانفرنس نال خطاب کریندے آکھی۔ قائم مقام صدر آکھیا جو احترامِ انسانیت ساݙے دین دی بنیادی تعلیمات اچ شامل اے تے آئینِ پاکستان سارے شہریاں کوں مساوی حقوق، مذہبی آزادی تے تحفظ ݙتے۔ انہاں آکھیا جو اقلیتاں دے حقوق دا تحفظ محض آئینی ہی نی بلکہ ساݙی دینی، اخلاقی تے قومی ذمہ واری وی اے۔ ایں سلسلے اچ سینیٹ اچ مائنارٹی کاکس دا قیام اقلیتی برادریاں دی پارلیمانی شرکت کوں تکڑا بݨاوݨ دے پاسے ہک اہم اقدام اے۔ یوسف رضا گیلانی واضح کیتا جو پاکستان ہمیشہ مذاکرات، سفارت کاری تے مکالمے دی حمایت کیتی اے تے پاکستان دا موقف واضح اے جو مضبوط دفاع دا مقصد جنگ کوں ودھارا ݙیوݨ نی بلکہ امن، خود مختاری تے اپݨے عوام دا تحفظ یقینی بݨاوݨا اے۔ انہاں مزید آکھیا جو دہشت گردی تے انتہا پسندی دے خلاف ساݙی مسلح افواج تے قانون نافذ کرݨ آلے اداریں دیاں قربانیاں قابلِ تحسین ہن تے ہݨ ساݙی ذمہ واری اے جو پیغامِ پاکستان کوں محض ہک دستاویز نی بلکہ ہک قومی عہد بݨاؤں۔