وزیرِاعظم محمد شہباز شریف نال پاکستان اچ اٹلی دے نویں تعینات سفیر یوگو سیارلاتانی دی ملاقات

اسلام آباد۔ 08 ستمبر (اے پی پی) وزیرِاعظم محمد شہباز شریف آکھیے جو اٹلی تے پاکستان وچال تعلقات کوں ٻیا تکڑا بݨاوݨ بالخصوص زراعت، آئی ٹی و مصنوعی ذہانت، صنعت، ٹیکسٹائل تے عوامی سطح تے رابطیں دے شعبیں اچ مکمل تعاون ݙتا ویسی۔ وزیرِاعظم دفتر دے میڈیا ونگ توں جاری بیان موجب اطالوی جمہوریہ دے پاکستان اچ تعینات تھیوݨ آلے نویں سفیر یوگو سیارلاتانی وزیرِاعظم ہاؤس اچ وزیرِ اعظم محمد شہباز شریف نال ملاقات کیتی۔ ایں موقع تے نائب وزیرِ اعظم و وزیرِ خارجہ سینیٹر محمد اسحاق ڈار، وزیرِاعظم دے معاونِ خصوصی سید طارق فاطمی تے سیکرٹری خارجہ سفیر آمنہ بلوچ وی موجود ہن۔ پاکستان اچ تعینات تھیوݨ آلے نویں اطالوی سفیر دا خیرمقدم کریندے وزیرِاعظم آکھیا جو پاکستان تے اٹلی وچال بہترین ݙوطرفہ تعلقات قائم ہن۔ انہاں اٹلی دی وزیرِاعظم جارجیا میلونی کیتے نیک خواہشات دا اظہار کیتا تے اطالوی رہنما دے نال اپݨی سابقہ ملاقاتاں دا ذکر کیتا۔ انہاں وزیرِاعظم میلونی دے مسلسل چار سال تئیں عہدے تے فائز رہݨ تے وی مسرت دا اظہار کیتا جیندے نال ہی او اٹلی دی طویل ترین مدت تئیں خذمتاں انجام ݙیوݨ آلی رہنما بݨ ڳئن۔ سفیر سیارلاتانی ملاقات دا موقع ݙیوݨ تے وزیرِاعظم دا شکریہ ادا کیتا تے آکھیا جو او اپݨی تعیناتی دے دوران پاکستان تے اٹلی دے تعلقات کوں ٻیا ودھارا ݙیوݨ تے مستحکم کرݨ کیتے بھرپور کوشش کریسن۔ ایں سلسلے اچ انہاں سانجھی دلچسپی دے سارے شعبیں اچ حکومت دے نال نیڑے تعاون دے نال کم کرݨ دے عزم دا اظہار کیتا۔ وزیرِاعظم یقین ݙیوائے جو ݙوہیں ملکاں وچال تعلقات کوں ٻیا تکڑا بݨاوݨ بالخصوص زراعت، آئی ٹی و مصنوعی ذہانت، صنعت، ٹیکسٹائل تے عوامی سطح تے رابطیں دے شعبیں اچ پاکستان دی پاسوں مکمل تعاون ݙتا ویسی۔