وفاقی وزیرِ داخلہ نال لبنان دے ہم منصب دی ملاقات، سکیورٹی تے انسدادِ دہشت گردی سمیت مختلف شعبیاں اچ تعاون ودھاوݨ تے اتفاق

اسلام آباد۔ 15 ستمبر (اے پی پی) وفاقی وزیرِ داخلہ محسن نقوی نال لبنان دے وزیرِ داخلہ احمد الحجار ملاقات کیتی، ڄیندے اچ ݙو پاسہ سکیورٹی تعاون، انسدادِ دہشت گردی تے آپسی تعلقات دے استحکام تے جامع ڳالھ مہاڑ تھئی۔ لبنانی وزیرِ داخلہ دی وزارتِ داخلہ آوݨ تے محسن نقوی انہاں دا پرتپاک خیرمقدم کیتا، ڄیندے بعد ݙوہائیں وزراء وچال پہلے ون آن ون تے ول وفود دی سطح تے مذاکرات تھئے۔ مذاکرات اچ دہشت گردی، منشیات دی سمگلنگ، غیر قانونی امیگریشن، منی لانڈرنگ تے سائبر کرائمز دے موثر سدِباب کیتے باہمی اشتراک کوں وسعت ݙیوݨ تے اتفاق کیتا ڳیا۔ ݙوہائیں ملکاں دہشت گرداں تے ڈرگ مافیا دی سرکوبی کیتے انٹیلی جنس شیئرنگ کوں مضبوط بݨاوݨ دے عزم دا اعادہ کیتا جڈانجو پولیس اکیڈمیز تے ٹریننگ پروگرامز کیتے آپسی تعاون، علاقائی صورتحال تے خطے اچ پائیدار امن کیتے پاکستان دیاں کاوشاں تے وی ڳالھ مہاڑ تھئی۔ فریقین ݙوہائیں وزارتاں وچال آپسی تعاون دے فروغ کیتے جلد ہک مفاہمتی یادداشت تے دستخط کرݨ تے ݙو پاسہ تعاون ودھاوݨ کیتے باقاعدہ فوکل پرسن مقرر کرݨ دا فیصلہ کیتا۔ ایں توں علاوہ انسدادِ منشیات دے شعبے اچ موجودہ مفاہمتی یادداشت تے مکمل عملدرآمد دی یقین دہانی کرائی ڳئی جݙانجو ݙوہائیں ملکاں وچال سفارتی تے سرکاری پاسپورٹس تے ویزا فری انٹری دی سہولت فراہم کرݨ دی تجویز تے وی غور کیتا ڳیا۔ وفاقی وزیرِ داخلہ محسن نقوی لبنانی ہم منصب دے دورے کوں خوش آئند قرار ݙیندیں ہوئیں امید ظاہر کیتی جو اے پیشرفت ݙوہائیں برادر ملکاں دے درمیان تعاون ودھیسی۔ لبنان دے وزیرِ داخلہ احمد الحجار پاکستان اچ شاندار مہمان نوازی تے شکریہ ادا کریندیں ہوئیں آکھیا جو لبنان پاکستان کوں ہک برادر ملک سمجھدے تے آپسی مفادات، خصوصاً داخلی سکیورٹی دے شعبے اچ ہک ٻئے دے تجربات توں بھرپور فیدہ چاوݨ چاہندے۔ مذاکرات اچ وزیرِ مملکت طلال چوہدری، وفاقی سیکرٹری داخلہ، چیئرمین نادرا، ڈی جی ایف آئی اے، ڈی جی اے این ایف، آئی جی فیڈرل کانسٹیبلری، نیشنل کوآرڈینیٹر نیکٹا، ڈی جی پاسپورٹس اینڈ امیگریشن، چیف کمشنر اسلام آباد، آئی جی اسلام آباد پولیس، ڈی جی نیشنل فرانزک ایجنسی، سپیشل سیکرٹری تے ایڈیشنل سیکرٹریز داخلہ سمیت اعلیٰ حکام شرکت کیتی۔