چیئرمین سینیٹ سرکاری دورے تے بیلاروس روانہ

اسلام آباد۔23 ستمبر (اے پی پی) چیئرمین سینیٹ سید یوسف رضا گیلانی سرکاری دورے تے بیلاروس روانہ تھی ڳئن۔ سینیٹ سیکرٹریٹ توں جاری بیان موجب اے دورہ کونسل آف دی ریپبلک آف بیلاروس دی چیئرپرسن نتالیہ کوچانووا دی دعوت تے کیتا ویندا پئے۔ دورے دا مقصد پاکستان تے بیلاروس وچال ݙوطرفہ تعلقات تے پارلیمانی تعاون کوں مزید مستحکم کرݨ اے۔ پاکستان تے بیلاروس دے تعلقات اچ ودھدی مثبت پیش رفت تے سیاسی، پارلیمانی، اقتصادی تے عوامی سطح تے سانجھے تعاون دے ودھارے دے مشترکہ عزم دے تناظر اچ چیئرمین سینیٹ دا اے دورہ خصوصی اہمیت رکھیندے۔ دورے دے دوران چیئرمین سینیٹ بیلاروس دے صدر، بیلاروس دی پارلیمنٹ دی قیادت تے ٻئے اعلیٰ حکام نال ملاقاتاں کریسن۔ ملاقاتاں اچ پاکستان تے بیلاروس دے ݙوطرفہ تعلقات، پارلیمانی رابطے و تبادلے، علاقائی تے عالمی امور سودھے سانجھی دلچسپی دے مختلف معاملیں تے ڳالھ کیتی ویسے۔ چیئرمین سینیٹ باقاعدہ پارلیمانی تبادلیں، ݙوہیں ملکاں دیاں پارلیماناں وچال ادارہ جاتی رابطے دے ودھارے تے ارکان پارلیمنٹ و پارلیمانی کمیٹیاں وچال مزید رابطے تے تعاون دی اہمیت تے زورݙیسن۔ چیئرمین سینیٹ دے رلے سینیٹرز میر دوستین خان ڈومکی، عمر فاروق کاسی، محسن عزیز، آغا شاہزیب درانی تے عامر ولی الدین چشتی وی بیلاروس دے دورے تے ہن۔ اے دورہ سینیٹ آف پاکستان دی طرفوں پارلیمانی سفارت کاری تے بین الاقوامی پارلیمانی رابطے دے ودھارے دے عزم دا مظہر اے، جیندا مقصد پاکستان دے وسیع ݙوطرفہ تے سفارتی اہداف دے حصول اچ موثر کردار ادا کرݨا اے۔