محسن نقوی تے چوہدری طلال دا مارگلہ روڈ دی موٹروے تئیں توسیع تے سنگجانی انٹرچینج پراجیکٹس دا دورہ، منصوبیاں تے کم 31 دسمبر تئیں مکمل کرݨ دی ہدایت

اسلام آباد۔10 اکتوبر (اے پی پی) وفاقی وزیرِ داخلہ محسن نقوی تے وزیرِ مملکت طلال چوہدری مارگلہ روڈ دی موٹروے تئیں توسیع تے سنگجانی انٹرچینج پراجیکٹس دا دورہ کیتا، وفاقی وزیرِ داخلہ ݙوہائیں منصوبیاں تے جاری ترقیاتی کماں دا تفصیلی جائزہ گھدا۔ وزارتِ داخلہ دے مطابق ایں موقع تے ڳالھ مہاڑ کریندیں ہوئیں محسن نقوی آکھیا جو منصوبے دی تکمیل نال اسلام آباد دے شہریاں کوں موٹروے تئیں آمدورفت دا متبادل راہ میسر ہوسی۔ وفاقی وزیرِ داخلہ منصوبیاں تے ڈبل شفٹ اچ کم جاری رکھݨ تے کم دی رفتار تیز کرݨ دی ہدایت کریندیں ہوئیں آکھیا جو منصوبیاں تے کم ہر صورت 31 دسمبر تئیں مکمل کیتا ون٘ڄے۔ محسن نقوی ڈپٹی کمشنر کوں تمام تر تجاوزات ہک ہفتے اچ کلیئر کرݨ دی ہدایت وی کیتی تے آکھیا جو منصوبیاں دی تکمیل اچ حائل تمام رکاوٹاں فوری دور کیتیاں ون٘ڄن۔ سی ڈی اے حکام وفاقی وزیرِ داخلہ کوں منصوبیاں تے پیشرفت دے حوالے نال بریفنگ اچ ݙسایا جو مارگلہ روڈ تا سنگجانی انٹرچینج منصوبے دی مجموعی لمبائی 2.7 کلومیٹر اے، منصوبے اچ ہک انڈر پاس تے ہک انٹرچینج شامل اے۔ چیئرمین سی ڈی اے، ڈپٹی کمشنر اسلام آباد تے متعلقہ حکام وی ایں موقع تے موجود ہن۔