نگران وفاقی وزیر اطلاعات تے نشریات سید علی ظفر لہور دے حلقہ این اے 135اچ اپنڑاں ووٹ پاتا الیکشن ٹائم تے تھیونڑ نال ساریاں قیاس آرائیاں دی کوئی اہمیت نی رہی ،ووٹراں دی تعداد 105ملین توں ودھ ہوونڑ دے باوجود پولنگ دے موقع تے چنگاں انتظام نظردا پئے، سید علی ظفر دی میڈیا نال گال مہاڑ

لاہور۔25جولائی(اے پی پی ) نگران وفاقی وزیر اطلاعات تے نشریات سید علی ظفر صوبائی دارالحکومت لہور دے حلقہ این اے 135اچ اپنڑاں ووٹ کاسٹ کیتا، انہاں سٹی سکول راوی کیمپس جوہر ٹاﺅن اچ قائم پولنگ اسٹیشن اچ اپنڑاں ووٹ کاسٹ کیتا۔ ایں موقع تے میڈیا نال گال مہاڑ کریندے ہوئیں سید علی ظفرآکھیا جو عام انتخابات 2018ءتاریخ دے اہم ترین انتخابات ہن،جنہاں کوں نگران حکومت شفاف بناونڑ دا اپنڑاں وعدہ پورا کیتے ،جینداثبوت ایہ ہے جو پورے ملک اچ آزادانہ ماحول اچ الیکشن تھیندا پئے۔ انہاں آکھیا جو نگران حکومت ایہو کم کرسگدی ہے، اگی تے فیصلہ عوام دا ہوندے جوانہاںکیرھی پارٹی کو ںاقتدار اچ گھن آونڑاں اے۔ سید علی ظفر آکھیا جو نگران سیٹ اپ جڈاں بنڑیا تاں ایہ قیاس آرائیاں ہن جو انتخابات دیر نال تھیسن، انٹرنیشنل میڈیا وی الیکشن دیر نال تھیونڑ دیاں گالھیں کریندا پیا ہا، پراپیگنڈہ جاری ہا تاں جوپاکستانی میڈیا اپنڑاں مثبت کردار ادا کیتے۔ انہاں آکھیا جو الیکشن کمیشن دے شکر گزار ہوں،الیکشن کمیشن ملک اچ شفاف انتخابات کراونڑ سانگے اہم کردار ادا کیتے، انتخابات نال پاکستان دی ترقی رلی ہوندی اے ۔ انہاں آکھیا جو پورے ملک اچ ووٹراں دی تعداد 105ملین توں ودھ ہے، ایندے باوجود پولنگ دے موقع تے چنگے انتظامات نظر دے پن ۔ انہاںامید ظاہر کیتی جو گزریل الیکشن دے مقابلے اچ ایں واری ٹرن آﺅٹ چنگا راہسی۔ سید علی ظفر آکھیا جو امید ہے جو ہرنڑ آلی پارٹی جتنڑ آ لی پارٹی دا خیر مقدم کرنڑ دے نال نال مبارخباد وی ڈیسی ،ایہو جمہوریت دا اصول ہے۔ صحافیاں دے پولنگ اسٹےشناں اچ داخلے دی اجازت دے حوالے نال پچھے گے سوال تے وفاقی وزیر آکھیا جو ایں سلسلہ اچ الیکشن کمیشن دے ضابطہ اخلاق تے عمل کیتا ویندا پئے ۔