علاقائی ممالک افغانستان اچ امن و استحکام چاہندن، ٹی ٹی پی دیاں افغانستان دے کڄھ صوبیاں اچ پناہ گاہیں ہین، نگران وزیراعظم انوار الحق کاکڑ دا انٹرویو

اسلام آباد۔9فروری(اے پی پی):نگران وزیراعظم انوار الحق کاکڑ آکھیے جو روس اتے چین سودھا خطے دے سارے ملک افغانستان اچ امن و استحکام چاہندن، ٹی ٹی پی دیاں افغانستان دے کڄھ صوبیاں اچ پناہ گاہیں ہین، تولو نیوز کوں انٹرویو اچ انہاں آکھیے جو امارات اسلامیہ افغانستان کوں منݨ کیتے علاقائی اتفاق رائے دی لوڑھ اے، ڄے تئیں خطے اتے ڄڳ دے ٻئے ملک افغانستان دی موجودہ حکومت کوں نئیں منیندے، پاکستان ایں بارے ہک قدم وی اڳو تے نا ودھسی، میں سمڄھداں جو خطے دے ملک چاہندن جو افغان حکومت کوں منیا ونڄے، حالی ایں بارے ویلھے دا کڄھ نئیں آکھیا ونڄ سڳدا، امید اے افغان حکومت کوں منݨ دا مسلہ تیکھے حل تھی ویسی۔ وزیراعظم آکھیے جو ڈیورنڈ لائن افغانستان اتے پاکستان وچال بین الاقوامی سطح تے منی ہوئی سرحد اے ڄیکوں اقوام متحدہ اتے 206 ممالک وی منیے، ایں بارے افغان عوام کیا سوچیندن ساکوں ایندے نال کوئی سروکار کائنی۔ انہاں آکھیا جو تحریک طالبان پاکستان (ٹی ٹی پی) دی افغانستان دے کڄھ صوبیاں اچ پناہ گاہیں ہین جیں پاروں پاکستان کیتے سیکورٹی دا مسئلہ ودھیے، اساں افغان حکومت تے انہاں لوکاں کوں ڄاݨ ٻڄھ تے پناہ ݙیوݨ دا الزام نئیںں لایا، کہیں وی ملک کوں افغانستان دے خلاف پاکستان دی فضائی حدود استعمال کرݨ دی اجازت نہ ݙتی ویسی۔