اسلام آباد۔19اپریل (اے پی پی):وفاقی وزیراطلاعات ونشریات مریم اورنگزیب منڳل کوں آپݨے عہدے دا چارج سنبھال ڳھدا۔وزارت اطلاعات اچ آپݨے دفتر آمد تے سیکرٹری اطلاعات شاہیرہ شاہد سودھے وزارت دے ٻئے اعلی ٰافسران وزیر اطلاعات و نشریات دا پرتپاک خیرمقدم کیتا، انہاں کوں وزارت دے امور دے حوالے نال بریفنگ وی ݙتی ڳئی ۔ مریم اورنگزیب ایں موقع تے ڳالھ مہاڑ کریندے ہوئیں آکھیے جو حکومت آزادی اظہار رائے تے کامل یقین رکھیندی اے ۔انہاں آکھیے جو میڈیا ہائوسز، تنظیماں اتے صحافتی برادری دی بہبود کیتے سارے ممکن اقدامات چیسوں۔ وفاقی وزیر پیکا آرڈیننس 2016 تے سارے سٹیک ہولڈرز نال مشاورت کرݨ دا اعلان کیتے ، انہاں دا آکھݨ ہعی جو ملک دے مثبت تشخص کوں اجاگر کرݨ کیتے سوشل میڈیا کوں فعال بݨایا ویسی تے ریاست تے ایندے اداریں دے خلاف منفی پروپیگنڈا کرݨ آلیں دے نال سختی نال نبݨیا ویسی ، انہاں آکھیے جو ملکی ترقی تے حکومت دے اہم ترقیاتی منصوبیں کوں ودھارا ݙیوݨ کیتے وزارت اطلاعات ونشریات دا کردار اہمیت رکھیندے ۔وفاقی وزیر اطلاعات و نشریات آکھیے جو پی ٹی وی اتے اے پی پی سودھے وزارت دے سارے اہم اداریں تے ایں ویلھے ملک دی موجودہ سیاسی و معاشی صورتحال اچ عوام کوں درست معلومات ݙیوݨ کیتے باری ذمہ واری لڳدی اے ،وزارت اطلاعات دے عوام کوں مستند معلومات اتے خبراں دی فراہمی اچ اہم کردار کوں بھلایا نی ونڄ سڳدا انہاں ایں توقع دا اظہار کیتے جو وزارت اطلاعات دے سارے ادارے عوامی مفاد دے پیش نظر اپݨے پیشہ وارانہ امور کوں بہتر انداز اچ انجام ݙیسن ، انہاں آکھیے جو وزارت اطلاعات اتے میڈیا اداریں دے درمیان رابطے دا ودھارا ساݙی اولین ترجیح اے ۔ایں موقع تے سیکرٹری اطلاعات، ایم ڈی پی ٹی وی اتے ایم ڈی اے پی پی سودھے وزارت دے ٻئے اعلیٰ افسران موجود ہن۔
