کراچی ۔21مارچ(اے پی پی) صدر مملکت ڈاکٹر عارف علوی دنیا دے تازہ ترین رجحانات اتے پیشرفت توں ہم آہنگ رہݨ کیتے تکھا کرݨ دے فیصلے دی لوڑھ تے زور ݙیندے ہوئیں آکھیے جو جامعات تعلیم و تربیت دے معیار کوں مزید بہتر کرن،جامعات خاص طور تے آئی ٹی دے شعبے اچ اعلیٰ معیار تے ر ہنر مند گریجویٹس تیار کرن ،جامعات آن لائن اتے ہائبرڈ ذریعہ تعلیم دی مدد توں ودھ تعداد اچ گریجویٹ پیدا کرن ، سماجی و اقتصادی ترقی کیتے پاکستان کوں آپݨے انسانی وسائل دی فکری ترقی اچ سرمایہ کاری کرݨی چاہیدی اے ۔ایوان صدر دے پریس ونگ موجب او پاکستان ایئر فورس ایئر وار کالج انسٹی ٹیوٹ دی سینیٹ دے اجلاس توں خطاب کریندے پئے ہن۔ صدر مملکت ڈاکٹر عارف علوی آکھیے پاکستان کوں 22 ملین سکولاں توں ٻاہروں ٻالاں کوں سکول اچ گھن آوݨ ، اعلیٰ تعلیمی اداریں اچ داخلیں دی شرح بہتر بݨاوݨی ہوسی ، پاکستان اچ صرف 9 فیصد طلبا ایف ایس سی دے بعد جامعات اچ داخلے گھن سڳدن ، پاکستان ہر سال آئی ٹی اتے متعلقہ شعبیں اچ صرف 35000 گریجویٹس پیدا کریندے ،صرف 35 ہزار آئی ٹی گریجوایٹس مارکیٹ دی لوڑھ پورا کرݨ کیتے گھٹ ہن ۔ انہاں آکھیے پاکستان کوں باقی دنیا نال رفتار برقرار رکھݨ کیتے آئی ٹی تے متعلقہ شعبیں اچ گریجویٹس دی تعداد اچ بہتر کرݨی چاہیدی اے ۔
