قوم کوں ہک محفوظ ماحول اچ الیکشن ݙیوݨ وزارت داخلہ، افواج پاکستان اتے سکیورٹی فورسز دی ذمہ واری ہئی، موبائل سروس اتے انٹرنیٹ بند تھیوݨ دی فیصلے کوں الیکشن نال ناں جوڑیا ونڄے، نگران وفاقی وزیر داخلہ ڈاکٹر گوہر اعجاز

اسلام آباد۔9فروری  (اے پی پی) نگران وفاقی وزیرداخلہ ڈاکٹر گوہر اعجاز آکھیا جو سکیورٹی خدشات پاروں ملک اچ الیکشن دے ݙینھ موبائل سروس اتے انٹرنیٹ بند کیتا ڳئیا۔ قوم کوں ہک محفوظ ماحول اچ الیکشن ݙیوݨ  وزارت داخلہ، افواج پاکستان اتے سکیورٹی فورسز دی ذمہ واری ہئی، موبائل سروس اتے انٹرنیٹ بند تھیوݨ دی فیصلے کوں الیکشن نال ناں جوڑیا ونڄے۔  نگران حکومت دی نیت اچ کھوٹ کائنا ہئی، عوام جئیں کوں ووٹ ݙتے اوندے نتیجے امدے پئن۔ او جمعے کوں نگران وفاقی وزیر اطلاعات تے نشریات مرتضی سولنگی دے رلے پریس کانفرنس توں خطاب کریندے پئے ہن۔  نگران وفاقی وزیرداخلہ  ڈاکٹر گوہر اعجاز آکھیا جو اٹھ فروری دا ݙینھ اساݙی پوری قوم کیتے وݙا ݙینھ ہئی، ست فروری دی شام کوں ݙو وݙے دہشت گردی دے واقعے تھیے جئیں اچ 28 شہادتاں تھیاں، انٹیلی جنس رپورٹس اچ ݙوہیں واقعے خودکش کائنا ہن اتے بم نصب ہن۔ موبائل نال دھماکہ کیتا ڳئیا۔ قلعہ سیف اللہ دا واقعہ ساریاں دے سامھے اے جیڑھا اساں کیتے ہک سبق ہئی۔ انہاں آکھیا جو الیکشن حکام  دی موبائل سروس بند تھیوݨ دے فیصلے اچ سانجھ کائنا ہئی۔ سکیورٹی ایجنسیز دی سفارش تے اینویں کیتا ڳئیا۔ انہاں آکھیا جو چیف الیکشن کمشنر سارے چیلنجرز دے باوجود رات ڳئے سامھے آئے اتے الیکشن دے عملے کوں ادھ ڳھنٹے دا ویلھا ݙتا، اساݙی پولیس ،افواج پاکستان ، لیویز ، الیکشن کمیشن ٹیم ، وزارت داخلہ ، میڈیا سودھے سارے سٹیک ہولڈرز پر امن انتخابات کیتے آپݨا آپݨا حصہ پاتا۔