مواصلات دی بندش صرف دہشتگردی دے واقعات روکݨ کیتے ہئی، جیڑھا جو مطلوبہ نمبر پورا کریسی اقتدار او ڳھنسی، نگران وزیراعظم انوار الحق کاکڑ دا انٹرویو

اسلام آباد۔10فروری  (اے پی پی) نگران وزیراعظم انوار الحق کاکڑ آکھیا جو عام انتخابات 2024 دے نتیجے توں نشابر تھیندے جو انتخابات  بحیثیت مجموعی   آزادانہ اتے  منصفانہ تھین۔ اساں پاکستان دے معاشی استحکام اتے نویں حکومت دی کامیابی کیتے دعا کریندوں، مواصلات دی بندش صرف دہشتگردی دے واقعات روکݨ کیتے ہئی، جیڑھا جو مطلوبہ نمبر پورا کریسی اقتدار او ڳھنسی۔ گزریل ݙینھ ٹی آر ٹی کوں ݙتے ڳئے انٹرویو اچ نگران وزیراعظم  انوار الحق کاکڑ آکھیا جو اقتدار ݙیوݨ دا اختیار پارلیمان دا اے۔ انتخابات کیتے پولنگ دے ݙینھ انٹرنیٹ اتے مواصلاتی بندش بارے سوال دے ولدے اچ انہاں آکھیا جو انتخابات توں ہک ݙٰینھ پہلے بلوچستان اچ ݙودہشت گرد حملے تھیے جئیں دا مقصد جمہوری عمل کوں متاثر کرݨ ہئی۔ سکیورٹی اداریاں ولوں وی ایجھی اطلاع ہئی جو اے سلسلہ صرف ݙو صوبیاں تئیں محدود کائنا رہسی۔ اساݙا کم عوام کوں سکیورٹی ݙیوݨ ہئی،  مواصلاتی بندش دا مقصد دہشتگرداں کوں انہاں دے مقاصد توں باز رکھݨ ہئی۔ ایندا مقصد کہیں سیاسی مداخلت کائنا ہئی۔ انہاں آکھیا جو پاتے ڳئے ووٹاں دی چھیکڑی تعداد بارے کجھ آکھݨ قبل از وقت اے جڈانجو لوکاں دی وݙی تعداد ووٹ پاوݨ کیتے ٻاہر نکلی اے۔ میکوں خوشی تھیندی جو اے ٹرن آؤٹ 40 توں پںجاہ فیصد ہوندا۔