لاہور ہائیکورٹ این اے 87 خوشاب اچ دھاندلی دے خلاف درخواست الیکشن کمیشن کوں بھیج ݙتی

لاہور۔12فروری(اے پی پی):لاہور ہائیکورٹ قومی اسمبلی حلقہ این اے 87 خوشاب توں ناکام امیدوار عمر اسلم خان دی الیکشن نتائج اچ دھاندلی کرتے مخالف امیدوار کوں کامیاب قرار ݙیوݨ دے خلاف دائر درخواست الیکشن کمیشن کوں بھجویندے ہوئیں قانون دے مطابق فیصلہ کرݨ دی ہدایت کیتی اے ۔عدالت کیس نبیڑ ݙتا ۔جسٹس علی باقر نجفی درخواست  تے سنوار کوں ابتدائی سماعت کیتی ۔ درخواست گزار دے وکیل بیرسٹر علی ظفر موقف اختیار کیتے جو فارم 45  موجب عمر اسلم کامیاب تھی چکئن، مگر ریٹرننگ افسر فارم 47 اچ مخالف امیدوار کوں فاتح قرار ݙتا۔ درخواست گزار دے وکیل استدعا کیتی جو عدالت فارم 45 دے نتیجے جاری کرݨ دا حکم ݙیوے ۔ عدالت درخواست الیکشن کمیشن کوں بھجواݙتی تے الیکشن کمیشن کوں قانون موجب فیصلہ کرݨ دی ہدایت کریندے ہوئیں فیصلہ نبیڑ ݙتا ۔