وفاقی وزیرِطارق فضل چوہدری دا اسلام آباد اچ مینھ توں بعد صورتحال دا جائزہ گھنݨ کیتے متاثرہ علاقیں دا دورہ

اسلام آباد۔1ستمبر (اے پی پی) وفاقی وزیر پارلیمانی امور ڈاکٹر طارق فضل چوہدری اسلام آباد اچ زور دے مینھ وسݨ دے بعد پیدا تھیوݨ آلی صورتحال دا جائزہ گھنݨ کیتے مینھ توں متاثرہ مختلف علاقیں دا دورہ کیتا۔ ایں موقع تے ضلعی انتظامیہ دے افسران تے مسلم لیگ (ن) دی مقامی قیادت وی اتھاں موجود ہئی۔ دورے دے دوران مختلف علاقیں اچ مینھ توں بعد پیدا تھیوݨ آلی صورتحال، نکاسیِ آب دے انتظامات تے شہریاں کوں پیش آندی اوکھ دا جائزہ گھدا ڳیا۔ نشیبی علاقیں تے سڑکاں تے جمع پاݨی تکھے کڈھݨ دی ہدایت کیتی ڳئی۔ آپݨی ہک ایکس پوسٹ اچ انہاں آکھیا جو شہریاں دی آونڄ بحال رکھݨ تے عوام کوں ہر ممکن سہولت ݙیوݨ کیتے سارے ضروری اقدامات کیتے ونڄن۔ زور دے مینھ پاروں کجھ علاقیں اچ نالے اوور فلو تھیوݨ نال شہریاں کوں اوکھ دا سامݨا کرݨا پئے تاں جو سی ڈی اے، میونسپل کارپوریشن، اسلام آباد انتظامیہ تے ٻئے متعلقہ ادارے فیلڈ اچ متحرک ہن۔ ضلعی انتظامیہ کوں ہدایت کیتی ڳئی جو نکاسیِ آب دے کم کوں مزید تکھا کیتا ونڄے جتھاں پاݨی جمع اے اتھاں تکھے کارروائی کریندے شہریاں دی اوکھ دا ازالہ کیتا ونڄے۔ انہاں آکھیا جو ڈپٹی کمشنر تے چیف کمشنر نال مسلسل رابطے اچ ہیسے تے صورتحال دی خود نگرانی کریندا پیاں تاں جو شہریاں دے مسئلے دا وقتی حل کڈھیا ونڄے۔ مسلم لیگ (ن) دی مقامی قیادت کوں وی ہدایت کیتی ڳئی اے جو او ضلعی انتظامیہ دے نال رل تے متاثرہ علاقیں اچ موجود رہن، شہریاں دے مسئلے دی نشاندہی کرن تے انتظامیہ دے تعاون نال انھاں دا تکھے حل یقینی بݨاون۔ حکومت اوکھے ویلھے عوام نال کھڑی اے