ٹیکنالوجی کوں موثر انداز اچ بروئے کار گھن تے جغرافیائی رکاوٹاں تے قابو پاتا تے بالخصوص پرے تے پسماندہ علاقیں دے عوام کیتے نظامِ انصاف کوں مزید نیڑے گھن آیا ونڄ سڳدے، چیف جسٹس پاکستان جسٹس یحییٰ آفریدی

اسلام آباد۔1ستمبر (اے پی پی) چیف جسٹس پاکستان جسٹس یحییٰ آفریدی آکھیے ٹیکنالوجی کوں موثر انداز اچ بروئے کار گھن تے جغرافیائی رکاوٹاں تے قابو پاتا تے بالخصوص پرے تے پسماندہ علاقیں دے عوام کیتے نظامِ انصاف کوں مزید نیڑے گھن آیا ونڄ سڳدے۔بلوچستان اچ ای کورٹس دا قیام عوام کوں سستا، وقتی تے سوکھا انصاف ݙیوݨ دی پاسے اہم پیش رفت اے۔ سپریم کورٹ دے شعبہ تعلقاتِ عامہ توں جاری اعلامیے موجب سپریم کورٹ آف پاکستان دی کوئٹہ برانچ رجسٹری اچ بلوچستان ہائیکورٹ دے رجسٹرار چیف جسٹس پاکستان جسٹس یحییٰ آفریدی، سپریم کورٹ دے جج جسٹس ہاشم خان کاکڑ تے چیف جسٹس بلوچستان ہائیکورٹ جسٹس محمد کامران خان ملاخیل کوں بلوچستان اچ ای کورٹس دے قیام متعلق بریفنگ ݙتی۔ بریفنگ اچ بلوچستان دے مختلف علاقیں جنھاں اچ ژوب، زیارت، گوادر، چمن، تربت، نصیرآباد تے مکران ریجن دے اضلاع شامل ہن، توں ججز تے وکلاء برادری دے ارکان ویڈیو لنک دے ذریعے شرکت کیتی۔ بریفنگ اچ ݙسایا ڳیا جو ای کورٹس دا مقصد وکلاء تے سائلین کوں آپݨے متعلقہ اضلاع توں ویڈیو لنک دے ذریعے مقدمیں دی پیروی دی سہولت ݙیوݨ اے۔ بلوچستان دے وسیع جغرافیائی کھنڈݨ، اضلاع تے کوئٹہ وچال لمبے فاصلیں، اوکھے علاقیں، سڑکاں دی خراب صورتحال تے کجھ علاقیں اچ امن و امان دے مسئلیں پاروں سائلین تے وکلاء کوں کوئٹہ دے لمبے تے مہانگے سفر توں نجات ملسی۔ ای کورٹس دے ذریعے مقدمیں دی وقتی سماعت ممکن تھیوݨ دے نال نال نظامِ انصاف کوں مزید قابلِ رسائی، موثر تے عوام دوست بݨاوݨ اچ مدد ملسی۔ بریفنگ اچ ݙسایا ڳیا جو چمن، خانوزئی، مسلم باغ، پشین، ژوب، دکی، قلعہ سیف اللہ، ڈیرہ اللہ یار، ڈیرہ مراد جمالی، گوادر، رکھنی ضلع بارکھان، کوہلو، خضدار، تربت، سبی، لورالائی تے کوئٹہ سودھے مختلف جہیں تے ویڈیو لنک دا ضروری سامان نصب کر ݙتا ڳئے۔ زیارت، ہرنائی، مستونگ، قلات، بیلہ، حب، نوشکی، خاران، دالبندین، پنجگور، سریاب، بسیمہ، قلعہ عبداللہ، ڈھاڈر، ڈیرہ بگٹی تے موسیٰ خیل سودھے باقی جہیں تے آلات دی تنصیب دا عمل جاری اے۔ ݙسایا ڳیا جو ٹرانسپورٹیشن دی اوکھ تے سڑکاں دی بندش پاروں آلات دی ترسیل اچ تاخیر تھئی تاں جو لاجسٹک عمل ایں ہفتے مکمل تھیوݨ دی توقع اے۔ چیف جسٹس پاکستان جسٹس یحییٰ آفریدی بلوچستان اچ ای کورٹس دے قیام دے اقدام دی تعریف کریندے آکھیے ٹیکنالوجی کوں موثر طریقے نال استعمال کریندے جغرافیائی رکاوٹاں ختم کیتیاں ونڄݨیاں چاہیدن تاں جو نظامِ انصاف بالخصوص پرے دے علاقیں تے سہولتاں توں محروم علاقیں دے عوام کوں نیڑے گھن آیا ونڄ سڳے۔