مصنوعی ذہانت تے جدید ٹیکنالوجی نال طلبہ تے استاداں کیتے ترقی دے نویں موقع پیدا تھیسن، وزیراعظم دا وزارتِ تعلیم تے گوتھ اے آئی وچال تعاون دی مفاہمتی یادداشت تے دستخط دی تقریب نال خطاب

اسلام آباد۔19 اکتوبر (اے پی پی) وزیراعظم محمد شہباز شریف آکھیے جو حکومت طلبہ دی معیاری تعلیم تے انہاں کوں جدید ٹیکنالوجی نال آراستہ کرݨ کیتے سارے ضروری وسائل ݙیسی، وزارتِ تعلیم تے گوتھ اے آئی وچال تعاون ملک دے طلبہ، استاداں تے جوان نسل کوں ترقی دے نویں امکانات میسرآسن، جدید تدریسی طریقیں دے ذریعے تعلیمی شعبے اچ مزید بہتری دے موقع تلاش کیتے ویسن جݙاں جو دانش سکول تعلیمی انقلاب برپا کرݨ تے معیاری تعلیم ݙیوݨ دی بھرپور صلاحیت رکھیندن۔انہاں اے ڳالھ وزارتِ تعلیم تے گوتھ اے آئی وچال تعاون دی مفاہمتی یادداشت تے دستخط دی تقریب نال خطاب کریندے آکھی۔ وزیراعظم شہباز شریف گوتھ اے آئی دی طرفوں پاکستان کوں ابتدائی طور تے 4 ہزار تعلیمی سبسکرپشنز ݙیوݨ دے اعلان دی تعریف کریندے آکھیے جو انہاں اچوں ہک ہزار سبسکرپشنز دانش سکول کری، اسلام آباد دے استاداں کیتے مختص کیتیاں ویسن۔وزیراعظم گوتھ اے آئی دی ٹیم دا شکریہ ادا کریندے امید ظاہر کیتی جو اے تعاون ترقی، خوشحالی تے سانجھے تعلقات دے ودھارے دے پاسے ھک مثبت پیشرفت ثابت تھیسی تے مستقبل اچ جدید تکنیکاں تے ٹیکنالوجیز توں استفادے دے مزید موقع پیدا تھیسن۔ انہاں دانش سکول کری دے استاداں نال مخاطب تھیندے آکھیا جو سکول دے دورے دے دوران انہاں دی کجھ استاداں نال ملاقات تھئی ہئی تاں جو او سارے استاداں نال ملاقات کرݨ چاہسن۔وزیراعظم سکول دے پرنسپل دی تعیناتی دا ذکر کریندے ݙسایا جو انہاں کوں پرنسپل ایں کیتے منتخب کیتا ڳئےکیوں جو او ہک قابل تے شاندار شخصیت ہن تے دانش سکول کری اچ تعلیمی انقلاب گھن آوݨ دی مکمل صلاحیت رکھیندن تے انہاں کوں پورا یقین اے جو دانش سکول دے طلبہ چنڳی کارکردگی ݙکھیسن۔وزیراعظم آکھیا جو دانش سکول کری اچ طلبہ کوں نہ صرف ساریاں ضروری سہولتاں ݙتیاں ڳئن بلکہ اے سہولتاں اوں تعلیمی ڈھانچے توں وی بہتر ہن جیڑھا جو انہاں پنجاب اچ قائم کیتا ہئی۔ طلبہ نال مخاطب تھیندے انہاں آکھیا جو اللہ تعالیٰ انہاں کوں ہک شاندار تعلیمی ادارے اچ تعلیم حاصل کرݨ دا موقع ݙتے تے ایں اچ انہاں دے والدین دیاں دعاواں دا وی اہم کردار اے، سکول اچ خوراک، رہائش، بورڈنگ تے لاجنگ، مفت یونیفارم، ای-لائبریریاں تے ٻیاں لیبارٹریاں سودھے ساریاں ضروری سہولتاں موجود ہن۔انہاں طلبہ کوں یقین ݙوایا جو انہاں دی تعلیم تے انہاں کوں بااختیار بݨاوݨ کیتے وسائل دی کوئی کمی نہ تھیوݨ ݙتی ویسے تے حکومت انہاں دے مستقبل کوں بہتر بݨاوݨ کیتے سارے ضروری وسائل ݙیسی۔ تقریب اچ وفاقی وزیر اطلاعات و نشریات عطاء اللہ تارڑ، وفاقی وزیر آئی ٹی شزا فاطمہ خواجہ، چیئرمین وزیراعظم یوتھ پروگرام رانا مشہود احمد خان، وزیرِ مملکت وجیہہ قمر، سی ای او گوتھ اے آئی تے پرنسپل دانش سکول کری اسلام آباد سودھے طلبہ تے استاداں شرکت کیتی۔