خیبرپختونخوا اچ گورنر راج دا مقصد معدنیات کائنی، امن دا قیام تے عوامی تحفظ اے،بیرسٹر عقیل ملک تے اختیار ولی خان دی پریس کانفرنس

اسلام آباد۔19 اکتوبر (اے پی پی) وزیرِ مملکت قانون و انصاف بیرسٹر عقیل ملک تے وزیراعظم دے کوآرڈینیٹر برائے اطلاعات خیبر پختونخوا اختیار ولی خان واضح کیتے جو خیبر پختونخوا اچ ایمرجنسی تے گورنر راج دا نفاذ کہیں معدنی وسائل تے قبضے کیتے کائنی بلکہ صوبے اچ امن و امان دی بحالی، سکیورٹی چیلنجز نال نبڑݨ تے عوام دے جان و مال دے تحفظ کیتے ناگزیر تھی چکیا ہئی، جے یو آئی دے سربراہ مولانا فضل الرحمن دا معدنیات متعلق بیانیہ حقیقت دے برعکس تے آپوں گھڑئے الزامات تے مبنی اے۔سنوار دے ݙینھ اتھاں مشترکہ پریس کانفرنس نال خطاب کریندے وزیرِ مملکت بیرسٹر عقیل ملک تے کوآرڈینیٹر اختیار ولی خان آکھیا جو پارلیمان دے ݙوہیں ایواناں تے مشترکہ اجلاس اچ آئین دے آرٹیکل 232 تے 234 دے تحت تفصیلی مباحثے دے بعد کثرتِ رائے نال اے آئینی اقدام منظور کیتا ڳیا تاں جو افسوس دا مقام اے جو ترائے ݙینھ دی خاموشی دے بعد ایں قومی معاملے کوں ہک سوچی سمجھی سازش تے بے بنیاد پروپیگنڈے دی نظر کرݨ دی کوشش کیتی ڳئی۔بیرسٹر عقیل ملک آکھیا جو صوبائی حکومت اپݨی آئینی ذمہ واریاں توں مکمل طور تے روگردانی کرچکی ہئی تے ایں دا واحد فوکس دھرنیں، لانگ مارچ تے تصادم تے ہئی۔ انہاں اعداد و شمار پیش کریندے واضح کیتا جو 2010ء تئیں صوبے اچ مائننگ دیاں 482 لیزز یا کنسیشنز ہن جیڑھیاں جو 2020ء تئیں ودھ تے 1,762 تھیاں، فروری 2024ء تئیں اے تعداد 3,962 تے اکتوبر 2026ء تئیں 4,917 تھی چکی اے۔ انہاں آکھیا جو 482 توں 4,917 تئیں دا اے غیر معمولی اضافہ پی ٹی آئی دے گزریل 13 سالہ ادوار اچ تھیا، ایں کیتے وفاق تے معدنیات تے قبضے یا امریکہ سودھے کہیں غیر ملکی قوت کوں لائسنس ݙیوݨ دا الزام قطعی طور تے بے بنیاد تے کوڑا اے، الزام لاوݨ آلے قوم دے سامݨے کوئی ہک ثبوت یا دستاویز پیش کرن۔بیرسٹر عقیل ملک آکھیا جو مولانا فضل الرحمن خود پارلیمنٹ دے فلور تے اعتراف کر چکئن جو انہاں دے آبائی علاقے ڈیرہ اسماعیل خان سودھے صوبے دے ٻہوں سارے ضلعیں اچ مغرب دے بعد ریاست دی رٹ نی رہندی تے تھاݨے غیر فعال تھی چکئن، سکیورٹی فورسز، پولیس تے شہریاں دیاں روزانہ دی بنیاد تے شہادتاں تھیندیاں پئن، جݙݨ پارلیمان دے مشترکہ اجلاس اچ ایں اہم مسئلے تے بحث تھیندی پئی ہئی تاں مولانا خود ایوان توں غیر حاضر ریہے تے انہاں دے کہیں رکن اوں ویلھے ایجھا کوئی الزام کائنی لاتا، وفاق آئینی تقاضیں دے تحت عوام دے تحفظ کیتے اے قدم چاتا تے 11 رکنی ایڈوائزری کونسل صوبے دے معاملیں دی بہتری کیتے کم کریندی پئی اے۔