تخلیقی معیشت دے ودھارے کیتے وزارتِ قومی ورثہ و ثقافت تے لاہور چیمبر رل تے کم کریسن، اورنگزیب خان کھچی

لاہور۔19 اکتوبر (اے پی پی) وفاقی وزیرقومی ورثہ و ثقافت اورنگزیب خان کھچی آکھیے جو قومی ثقافتی ورثے، روایتی فنون تے دستکاریاں کوں عالمی سطح تے متعارف کراوݨ حکومت دی اہم ترجیحات اچ شامل اے، تخلیقی معیشت دے ودھارے کیتے وزارتِ قومی ورثہ و ثقافت تے لاہور چیمبر رل تے کم کریسن۔انہاں اے ڳالھ لاہور چیمبر اچ منعقدہ اجلاس نال خطاب کریندے آکھی۔ لاہور چیمبر دے صدر علی حسام اصغر تے وفاقی سیکرٹری اسد رحمن گیلانی وی ایں موقع تے خطاب کیتا۔وفاقی وزیر اورنگزیب خان کھچی آکھیا جو پاکستان دے ثقافتی ورثے، روایتی فنون تے دستکاریاں کوں عالمی سطح تے متعارف کراوݨ حکومت دی اہم ترجیحات اچ شامل اے۔ انہاں ݙسایا جو وزارتِ قومی ورثہ و ثقافت دی مفاہمتی یادداشتاں دی تعداد ہک سال اچ 23 توں ودھ تے 40 تھی ڳئی اے جݙاں جو پاکستان دے 6 مقامات یونیسکو دی عالمی ثقافتی ورثے دی مستقل فہرست اچ شامل ہن۔انہاں پاکستان دے عالمی ثقافتی ورثے دے جہیں دے حوالے نال بھارت دے 30 تے چین دے 60 جہیں دا حوالہ ݙیندے آکھیا جو پاکستان کوں اپݨے تاریخی ورثے دی عالمی سطح تے شناخت ودھاوݨ کیتے مزید اقدامات کرݨے ہوسن۔ وفاقی وزیر ݙسایا جو اڄوکے سال 2 تاریخی جہیں کوں یونیسکو دی مستقل عالمی ورثے دی فہرست اچ شامل کراوݨ کیتے پیشرفت تھئی اے۔انہاں آکھیا جو لاہور کوں 2026-27ء کیتے شنگھائی تعاون تنظیم دا سیاحتی و ثقافتی دارالحکومت قرار ݙتا ڳئے، جیندے تحت لاہور اچ 3 توں 4 وݙے ثقافتی پروگرام منعقد کرݨ دے منصوبے ہن جݙاںجو کراچی، اسلام آباد تے ایس سی او دے رکن ملکاں دی ثقافتی شرکت کوں وی ودھارا ݙتا ویسے۔ انہاں لوک میلہ کوں پاکستان دا بین الاقوامی ثقافتی پلیٹ فارم قرار ݙیندے آکھیا جو پاکستانی فنکاراں تے کاریگراں کوں عالمی سطح تے متعارف کراوݨ کیتے مزید موقع ݙتے ویسن۔