برآمدات اچ ودھارا پاکستان دے معاشی استحکام تے ترقی دی واحد پائیدار راہ اے،احسن اقبال

اسلام آباد۔ 03 ستمبر(اے پی پی) وفاقی وزیرمنصوبہ بندی، ترقی تے خصوصی اقدامات احسن اقبال آکھیے جو پاکستان کوں پیش آندے معاشی چیلنجز نال نبڑݨ تے حقیقی معاشی تبدیلی کیتے برآمدات اچ نمایاں ودھارا ناگزیراے، جݙاں جو قرضیں دے سہارے حاصل کیتا ونڄݨ آلا معاشی استحکام دیرپا بنیاد نی ݙے سڳدا۔ انہاں آکھیا جو حقیقی معاشی استحکام اوں ویلھے ہی ممکن اے ڄݙاں او مزید قرضیں دے ٻوجھ تے مبنی نہ ہووے۔ پاکستان کوں پائیدار اقتصادی ترقی کیتے اپݨی برآمدات اچ ودھارا تے عالمی منڈی اچ اپݨی مسابقتی صلاحیت بہتر بݨاوݨی ہوسی۔ وفاقی وزیراے ڳالھ ایشیائی ترقیاتی بینک دے جنوبی، وسطی تے مغربی ایشیا دے نائب صدر ینگ منگ یانگ نال اسلام آباد اچ ملاقات اچ آکھی۔ ملاقات اچ پاکستان دے ترقیاتی ایجنڈے، ’’اڑان پاکستان‘‘ دے تحت جاری اصلاحات تے معاشی ترقی کیتے ایشیائی ترقیاتی بینک دے تعاون سودھے مختلف امور تے ڳالھ مہاڑ تھئی۔ وفاقی وزیراحسن اقبال ایشیائی ترقیاتی بینک تے زورݙتا جو او برآمدات دے ودھارے تے انہاں اچ تنوع پیدا کرݨ کیتے ھک جامع حکمتِ عملی تے عملی روڈ میپ دی تیاری اچ تکنیکی معاونت ݙیوے۔ انہاں آکھیا جو ماضی اچ وژن 2010 دے تحت ایشیائی ترقیاتی بینک دی تکنیکی معاونت پاکستان کیتے اہم رہی، ایں نوعیت دی معاونت کوں موجودہ دور دے تقاضیں نال ہم آہنگ کریندے برآمدات دے شعبے اچ وی بروئے کار گھن آیا ونڄ سڳدے۔ احسن اقبال آکھیا جو حکومت 2035ء تئیں پاکستان دی معیشت کوں ایک ہزار ارب ڈالر تئیں پڄاوݨ دا ہدف مقرر کیتے تے وزیراعظم محمد شہباز شریف ایں مقصد کیتے درپیش رکاوٹاں مکاوݨ تے اہم شعبیں اچ اصلاحات کیتے پرعزم ہن۔ انہاں آکھیا جو صنعت، غذائی تحفظ، تجارت تے خارجہ امور سودھے اہم شعبیں اچ اصلاحات دے نال نال معاشی سفارت کاری کوں موثر انداز اچ بروئے کار گھن آوݨ حکومت دی ترجیحات اچ شامل اے۔